zgjohu.com.mk | Lëvizja Qytetare ZGJOHU! - Shkup

Lëvizja Qytetare ZGJOHU! dënon ashpër sulmin barbar të huliganëve maqedonas të ashtuquajtur "Komiti" kundër fëmijëve të pafajshëm shqiptarë që ndodhi ditën e shtunë në sheshin e Shkupit pas ndeshjes futbollistike Rabotniçki - Vardar dhe kërkon që shkaktarët të përballen me ligjin ditë më parë.

Lëvizja ZGJOHU! përkujton autoritetet e Ministrisë së Punëve të Brendshme që ky grup i huliganëve është po i njejti grup që dhunoi banorët e pafajshëm të Nerezit në shtator të vitit të kaluar duke cenuar jetën dhe pronën e tyre si dhe janë po të njejtët huliganë që u amnestuan nga autoritetet për terorin e paparë ndaj qytetarëve të pafajshëm. Ministria e Punëve të Brendshme në vend që t'i arrestojë menjëherë, luante futboll dhe shoqëroheshte me këta huliganë të egër të ikur nga kafazët e kopshtit zoologjik.

Asnjë rrahje, asnjë enciklopedi, asnjë imponim, asnjë manipulim që ka për qëllim shpërnguljen e shqiptarëve nga Kumanova dhe Shkupi si dhe asnjë proekt tjetër nuk do të arrijë t'i zhduk shqiptarët nga trojet e tyre shekullore, andaj ZGJOHU! porosit proektuesit e këtyre provokimeve që të heqin dorë nga qëllimet e tyre djallëzore që mëtojnë t'i realizojnë me metoda shtazarake!

Lëvizja ZGJOHU! apelon deri te autoritetet e Ministrisë së Punëve të Brendshme dhe Prokurorit Publik që urgjentisht të ndërmarrin masa kundër huliganëve që terorizojnë qytetarët e pafajshëm dhe haptazi shfaqin urrejtje ndëretnike duke nxitur mosdurim midis komuniteteve. Sulmuesit që në mënyrë të turpshme cenuan jetën e një 11 vjeçari duhet që urgjentisht të marrin dënimin e merituar.

Lëvizja Qytetare ZGJOHU! shprehet jashtëzakonisht e shqetësuar nga lajmet për shpërngulje të theksuar të qytetarëve shqiptar nga Maqedonia në drejtim të Evropës perendimore në kërkim të jetës më të mirë.

ZGJOHU! informon të gjithë qytetarët që liberalizimi i vizave për qytetarët e Maqedonisë paraqet vetëm një mundësi për udhëtime turistike dhe qëndrime të shkurtëra deri në 90 dite në vendet e zonës shengen pa asnjë mundësi për punë dhe studim në ato vende. Leja për punë në Evropën perendimore mundësohet vetëm nëpërmjet marrjes së vizës të tipit D që kushtëzohet me lejen e punës në vëndin përkatës. Maqedonia gjithashtu ka nënshkruar marrëveshje me Unionin Evropian si dhe me çdo vend anëtar të zonës shengen për rikthim të qytetarëve të saj dhe në këto shtete nuk është e mundur t'u ipet azil qytetarëve nga Maqedonia.

Lëvizja ZGJOHU! bashkë me Shoqatat e Historianëve, Arsimtarëve, Piktorëve, Intelektualëve, Artistëve dhe Shkrimtarëve shqiptarë si dhe shumë OJQ tjera apelojnë deri te të gjithë agjencionet turistike që mos t'i manipulojnë qytetarët shqiptarë duke i keqinformuar rreth mundësive për qëndrim dhe punë në vendet e Evropës perendimore si rezultat i liberalizimit të vizave për qytetarët e Maqedonisë. Mallkimi i kombit do të bie mbi ato që me gënjeshtra po krijojnë rradhë të tëra të qytetarëve për të braktisur trojet e baballarëve dhe po shesin pasurinë e tyre familjare për një gënjeshtër turistike për përfitime mbi tragjedinë e popullit.

Vështirësitë ekonomike të qytetarëve tanë nuk do të zhdukën duke e shitur gjithë pasurinë e tyre dhe duke u shpërngulur për të hasur në një zhgënjim edhe më të madh sesa në vendin e tyre. Patriotizmi fillon ke pragu i derës dhe rruga jonë mund të jetë e gjatë, ngjitja jonë mund të jetë e vështirë, por ajo çka historia na ka mësuar është se në keto troje, ne vuajmë dhe rimëkëmbemi si një, sepse jemi një.

Një vend pa artefakte është vend pa kujtesë, një vend pa kujtesë është një vend pa histori, një vend pa njerëzit e vet, nuk është vend.